Tal 2013 al è stât puartât insom il progjet scomençât ai 23 di Avrîl dal 2009, fat bon un protocol di intese jenfri la Provincie di Udin e Glesie Furlane par meti adun in cinc angs 2009-2013 une racuelte complete dai scrits di pre Antoni Beline. 
Il progjet al è stât pastanât di Glesie furlane, e fat bon de Provincie di Udin cuntun contribût anuâl par cinc agns pe realizazion di «Pre Antoni Beline: un profete pal Friûl di doman». Vâl a dî, la racuelte e la publicazion dal patrimoni leterari di Pre Antoni Beline intune edizion complete e organiche. 
L’impegn, fat bon dal President de Provincie Pietro Fontanini e sotscrit di Glesie Furlane, al è stât di 80 mil euros pe publicazion di nûf oparis di Pre Antoni Beline: «Sul at di voltâ pagjine», «Par amôr o par fuarce?», «Eutanasie di un Patriarcjât», «Amôr di patrie», «Fortunât il popul che il Signôr al è il so Diu», «Rogazions», «Cirint lis olmis di Diu - V», «Trilogjie» e «De Senectute». 

 

Il libri Hosanna che si sta doprant tes liturgjiis al à za passe 13 agns. Stant che in chest fratimp a son jessûts in maniere uficiâl la Bibie, il Lezionari e cumò, a curt, si spere il Messâl o pensìn che ancje l'Hosanna a vedi bisugne di une integrazion e revision grafiche. O stin lavorant pe riedizion.

Pre Antoni Beline: un profete pal Friûl di doman
Necessitât di un progjet:
la publicazion de “Opera omnia” di pre Antoni Beline

I articui publicâts in chest ultim an su pre Antoni Beline (1941-2007), la “Memorie” de Universitat di Udin (22 di mai a. c.), i incuintris e lis conferencis fatis su di lui e pe sô opare leterarie nus visin che chest predi e mestri, scritôr e gjornalist al reste un pont di riferiment une vore impuartant no dome pal popul furlan ma ancje pes Istituzions civîls, cuturâls e religjôsis dal nestri Friûl e pal dibatit culturâl des minorancis lenghistichis in Italie e fûr; la ricjerce continue dai siei libris e scrits nus palese che int di ogni categorie e provenience, ch’e sepi la lenghe furlane o no, e desidere nudrîsi, istruîsi e imparâ des sôs intuizions e riflessions, des sôs peraulis e dai siei studis.
Confinâ pre Antoni intai scafai di une biblioteche, ricuardâlu come un personagjo dal passât, laudâlu come scritôr cence sintîlu insedât intal popul, al significarès cjapâsi la responsabilitât denant de storie di vê soterât un om e un patrimoni unics e cualificâts e maglâsi de colpe di vê pierdude la grande ocasion de cussientizazion des gnovis gjenerazions midiant chê peraule profonde e vive che lui al veve.
Par chest motîf o sin convints che nol è suficient contentâsi di ce che fin cumò al è stât publicât, ma al è necessari dâ dongje dut il patrimoni leterari che pre Antoni al à lassât par presentâlu come “Opera omnia” intune edizion organiche e complete.
Il Grop di Glesie furlane al sint in maniere inderogabil l’impegn pal progjet “Pre Antoni Beline: un profete pal Friûl di doman”; za si sta organizant par chest motîf e al metarà dute la sô buine volontât tal inmaneâ un lavôr che al menarà benefici a dut il Friûl.
Cheste imprese e domande competence, volontariât, timp e passion, ma e à dibisugne ancje di un supuart economic che une Associazion come la nestre no je intes condizions di podê fâ front.
O pensìn che une istituzion come la Provincie di Udin, magari adun cun chês di Gurize e Pordenon, e vedi tant i valits motîfs che lis pussibilitâts par podê sustignî e puartâ a bon fin cheste opare che se no e restares une utopie.
Lis oparis di pre Antoni a puedin jessi catalogadis in chestis grandis categoriis:
- articui ch’a riguardin la politiche, la religjon e l’atualitât; 
- antropologjie e memoriis popolârs;
- oparis sapienziâls;
- scrits finalizâts a determinadis ocasions; 
- corispondence;
- traduzions.
Dut chest patrimoni, in part al è za stât publicât;
in part si è esaurît intai agns o al è ridusût a un minim di copiis;
in part al è inedit;
in part al è su cassetis audio di trascrivi (conferencis e v. d.).
Il materiâl al è tant e a volaran agns par rivâ a la publicazion complete de “Opera omnia”.
Dut al à di sedi fat seont une tabele di intervents ben precisâts e seont une dissipline sientifiche dal dì di vuê.
Il grop di Glesie Furlane al à za dade dongje une sô valutazion sul cemût scomençâ de bande juste il lavôr, al à contatât personis cualificadis, al sarès pront pe publicazion des oparis cjalant ai libris che in chest moment a son i plui domandâts de int.
Rivant al concret, une prime part de vore de publicazions e podarès sedi cheste:
PUBLICAZIONS
- Sul at di voltâ pagjine, un scrit di antropologjie popolâr su la int e i paîs de Cjargne di passe vincj e cinc agns indaûr; golaine “Memoriis”.
- Par amôr o par fuarce? un dai prins scrits di pre Antoni; al presente i principis di fonde pe liberazion dal popul furlan; golaine “Risultivis”.
- Eutanasie di un Patriarcjât, la storie de fin de nestre autonomie glesiastiche; golaine “Memoriis”.
- De senectute, riflessions sul lâ a mont de vite.
- Amôr di Patrie, editoriâi di pre Antoni publicâts su Patrie dal Friûl; prin volum (agns 1978 – 1983) di publicâ in colaborazion cu la clape culturâl Patrie dal Friûl.
- Furtunât il popul che il Signôr al è il so Diu, riflessions par un studi de Bibie,
- Rogazions, riflessions sul argoment,
- Cirint lis olmis di Diu – V, i ultimps articui publicâts su La Vita Cattolica,
- Trilogjie, Predi in scuele e mestri in glesie, La moralitât di un inmorâl, Om contraditori e segnâl di contradizion, premi S. Simon 1999.
CASSETIS AUDIO DI TRASCRIVI E PUBLICÂ
- Trascrizion des regjistrazions dai incuintris, conferencis, predicjis e v. d.
- Riversament su CD des regjistrazions di meti in alegât aes publicazions (Audiolibri)
CUNVIGNIS E INCUINTRIS
Incuintris e cunvignis di presentazion sul stât di vanzâment des voris e di presentazion des publicazions. 

Patrie dal Friûl -Vilegnove di S. Denêl, ai 17 di Setembar dal 2008

O vin in cantîr di preparâ un libri dal titul “Saghe furlane” di Sef Cjargnel. Si trate di contis de tradizion furlane scritis di pre Sef pal mensîl La Patrie dal Friûl dal 1979 al 1988. Il libri al varà ancje il supuart des ilustrazions des contis che a vignaran fatis di Gianni di Lena.
In stuc
SAGHE FURLANE «Saghe», dal todesc, al volares dí: racont, lejende. Inpen di chestis dos ultimis, o vin vut miôr doprâ la peraule «saghe», par vie che tes leteraturis nordichis cheste e à cjapât su un significât profont di: racont sinbolic» e ancje «racont che si riferís 'e storie di une gjernassie». O pensín che tantis lejendis dal Friûl, studiadis a fons, e puedin pandinus alc sul passât de nestre cocje che tes lejendis tramandadis di nóno in nevôt e ten cont alc di etis lontanis e di gjemassîs tant difarentis che, cul lâ dal tinp, e àn dât dongje chest spetacul di misclic ch'al é il popul furlan. Plui di cualchi studiôs al à peât 'e mitologje celtiche personagjos uso «aganis» e «salvans». Ma dal sigûr e àn di jessi di venti atôr âtris, uso «macarots», «orcui», «marangulis» e sorte. 'E ete romane e jú di lí o podin meti in cont lejendis tipo chê di Madone di mont e di Atile. Pai Langobârts o vin i riferiments ai pajans. E fasin part de mitologje medievâl e cristiane lis contis di sants, di «danâts» e âtris personagjos sorenaturâi uso «screts».

Al è in vore pe publicazion te golaine Risultivis cul n. 5 il volum “L’ÀN PIERDUDE LANT A MESSE IN CHÊ DÌ CH’A SON SPOSÂZ Riflessions su famee e matrimoni di Antoni Beline
FAMEE: MITO O VOCAZION?
I1 titul di cheste publicazion al vuel puartânus a fà un moment di riflession su la famee in Friûl.
La famee fin chê âtre dì e veve un so stamp, un model che nissun al podeve tocjâ e jere come une leç in tai secui, un grant mito.
Ma il mont al è gambiât e il mito al è colât. Âtris fameis, plui culturis, gnûfs interes, diferenz ponz di viste in sornade di vuê!
Dulà si cjatìno? Al sta colant un mito, al sta sparint un model di famee. Si domandìn: erial l’unic model?
Al è rivât, al sta rivant un gnûf model di matrimoni. Si domandin: ise une gnove vocazion, un alc di gnûf, plui biel, plui uman, plui evangjelic di une volte?
In cheste prospetive o vin di lei chest librut: tentatîf par capî miôr il moment che lis nestris fameis a stan passant.

Al è in vore pe publicazion il volum “DE SENECTUTE” di Antoni Beline

Al è in vore pe publicazion il volum “PAR AMÔR O PAR FURCE” di Antoni Beline. Si trate dai editoriai scrits pal mensîl La Patrie dal Friûl dal 1979 al 1988.