Ultimade la vore dal Lezionari, o vin metût man a colp tor dal Messâl e, a distance di 5 agns, cumò, fat il prin stampon, controlât il secont, cumò o vin sistemât ancje il tierç, dopo al vignarà preparât il prototip che al larà a la Congregazion dal Cult divin e pe dissipline dai Sacraments pe aprovazion, si spere. Duncje si è ormai dapît. Culì si sa che il tamês dal Vatican al è ancjemò plui fin.

Cul Messâl aprovât dal Vatican, o metarìn man ai Sacraments (Batisim, Cresime, Riconciliazion, Unzion dai malâts, Matrimoni…) e dai Sacramentâi (Funerâi…) in mût che lis nestris comunitâts cristianis a vedin a disposizion ducj i sussidis che a coventin par celebrâ cun fede e cun profit i moments plui impuartants de vite.

Stant che la plui part des cunvignis e dai incuintris che si tegnin mês par mês a Vençon a son un grum valits e di interès e a son regolarmentri regjistrâts su cassete audio si sta lavorant par decodificâ lis cassetis in viste de publicazion dai ats.

La nestre Associazion di agns e lavore, par cont des Diocesis dal Friûl, pe publicazion dal Messâl, che al spiete ormai dome l’aprovazion de Congregazion pal Cult de Sante Sede. Cumò nô o stin preparant la publicazion de Regule de Messe, in mût che i fedêi a vedin sot man il test definitîf des rispuestis e cussì celebrâ la Messe dute par furlan.