Glesie Furlane intal an dal conferiment dai Premis Epifanie 2016 a pre 'Sef Cjargnel e vûl dâ un altri ricognossiment ae ativitât di musicolic dal so esponent cu la publicazion “Corâi de cristianitât todescje voltâts par furlan”. Pre 'Sef al à metût adun e tradot numerôs “Corâi”, ven a stâi tescj de tradizion musicâl liturgjiche di origjin todescje (diviers a son dal 1600, altris plui resints), ricognossint in lôr un grant valôr e une sintonie pussibile cu la musiche liturgjiche de tradizion furlane. Analizant il contignût de publicazion, che chi o proponìn dome cuntune “cerce”, e je imediade e evidente la compatibilitât e la grande adatabilitât dai “Corâi in lenghe todescje” ancje par un ûs liturgjic furlan. Il progjet, realizât in graciis dal fondamentâl contribût de Provincie di Udin, al coniughe tradizion todescje e tradizion furlane intun confront positîf tra patrimonis musicâi internazionâi.