BIBIE IN LINIE

Cjapitul 1

Direzion

1 1 Pauli, apuestul di Crist Gjesù par ordin di Diu nestri salvadôr e di Gjesù Crist nestre sperance, 2 a Timoteu, vêr fi inte fede: gracie, misericordie e pâs de bande di Diu Pari e di Gjesù Crist nestri Signôr.

Difese de dutrine cuintri dai fals dotôrs

3 Cuant che o soi partît pe Macedonie, ti ài racomandât di restâ a Efeso, par che tu invidassis cualchidun a no insegnâ robis diferentis 4 e a no lâ daûr des contis e des gjenealogjiis che no finissin plui, ch’a servissin plui a inviâ cuistions che a judâ il plan di Diu de salvece fondade su la fede. 5 L’intent di cheste racomandazion al è però l’amôr, ch’al partìs di un cûr mont, di une buine cussience e di une fede cence falsetâts. 6 Propit par jessisi slontanâts di chestis robis, un pôcs di lôr si son pierdûts in cjacaris cence fondamente, 7 pretindint di jessi dotôrs de leç cu la cuâl che no capissin ni ce ch’a disin ni ce ch’a puartin a conferme di chel ch’a insegnin.

La leç no je pai juscj, ma pai triscj

8 Sigûr, o savìn che la leç e je buine; a pat però che si le dopri come cu va, 9 savint che la leç no je stade metude par chel ch’al è just ma pai triscj e pai ribei, pai pecjadôrs e par chei cence religjon, pai sacrilics e pai profanadôrs, par chei ch’a copin il pari e la mari, pai sassins, 10 pai sporcacjons, par chei ch’a van fra di lôr, pai marcjadants di oms, pai bausârs, par chei ch’a zurin il fals e par cualunche altri vizi ch’al va cuintri de sane dutrine 11 seont il vanzeli de glorie dal Diu beât, che mi è stât dât in consegne.

Il boncûr di Diu inte conversion di Pauli

12 Par chel jo o ringracii Crist Gjesù, nestri Signôr, che mi à dade fuarce parcè che mi à ritignût degn di fiducie metintmi al so servizi; 13 propit me, che prime o jeri un blestemadôr, un persecutôr e un violent. Però mi è stade doprade misericordie parcè che o vevi fat chel tant ta l’ignorance, cuant che o jeri lontan de fede. 14 Che anzit la gracie dal Signôr nestri e je lade adiriture parsore cu la fede e cul amôr ch’al è in Crist Gjesù.

15 Di fat cheste e je une peraule ch’e merte crodude e acetade: Crist Gjesù al è vignût tal mont par salvâ i pecjadôrs, che il prin o soi jo. 16 Ma propit par chel o ài cjatade misericordie: par che Gjesù Crist al mostràs in me, par prin, dute la sô bontât, come esempli di chei che a varessin crodût in lui pe vite eterne.

17 Al Re dai secui, l’incorutibil, invisibil e unic Diu, glorie e onôr pai secui dai secui. Amen.

“Combat la buine batae” de fede

18 Cheste racomandazion le met tes tôs mans, Timoteu, fi gno, in armonie cu lis profeziis che si son za palesadis tai tiei confronts, par che, tignût sù di lôr, tu combatis la buine batae, 19 mantignint la fede e la buine cussience. Di fat, par vêle butade vie, cualchidun al è lât in sfas cu la fede. 20 Fra di lôr ancje Imeneu e Alessandri, che ju ài consegnâts a satane par ch’a imparin a no blestemâ plui.

Notis:

  • 1,4 - No si trate di eresiis ma di chês fantasiis e matetâts che no àn mancjât in nissune ete de storie nancje tes cuistions religjosis.
  • 1,7 - Lis novitâts a vignivin di int ch’e crodeve e ch’e voleve intindisi de leç di Mosè. Cussì al spieghe ce che si à di pensâ de leç.
  • 1,9 - La leç e ten frenâts i triscj.
  • 1,15 - “Il prin” vadì il plui grant. Si presente il spieli di Pauli ch’al sa ricognossi la ricjece dai dons di Diu e ancje la sô puaretât umane.
Cjapitui: