La sapience in sé

Prejere di Salomon

9 1 “Diu dai vons e Signôr di boncûr,

che cu la tô peraule tu às fat dut il mont

2 e che cu la tô sapience tu às dat dongje l’om,

par ch’al paroni su lis creaturis fatis di te,

3 tu che tu regis il mont cun santitât e cun justissie

e che tu fasis sentence cun cûr sclet,

4 dàmi la sapience ch’e je sentade dongje des tôs sentis,

e no sta lassâmi fûr dal mac dai tiei fameis,

5 parceche jo o soi to servidôr e fî de tô sierve,

om debul e di vite curte

e no in stât di capî la justissie e lis lez.

6 Par tant che un al sedi perfet framieç dai fîs dal om,

se j mancje la sapience ch’e ven di te,

al sarà considerât un nuje.

7 Tu tu mi às sielzût tanche re dal to popul

e judiç dai tiei fîs e fiis;

8 tu mi às ordenât di fâti sù un templi su la tô sante mont,

un altâr te citât là che tu sês a stâ,

inmagjine de tende sante

che tu vevis prontade inmò sul imprin.

9 Cun te e je la sapience, ch’e cognos lis tôs voris,

ch’e jere li cuanche tu fasevis il mont;

jê e cognos ce che ur plâs ai tiei vôi

e ce ch’al è seont i tiei decrez.

10 Mandile jù dai cîi sants,

mandile jù de sente de tô glorie,

par che si strachi cul stâmi daprûf

e ch’o puedi cognossi ce che tu às agrât.

11 Difat jê, ch’e dut e capìs e a cognos,

mi indreçarà cun savietât tes mês azions

e mi tignarà cont inte sô glorie.

12 Alore tu varâs a grât lis mês voris,

o rezarai il to popul cun justissie

e o sarai degn de sente di gno pari.

13 Cuâl om, difat, puedial cognossi il plan di Diu?

O cui puedial vê une idee di ce ch’al ûl il Signôr?

14 Spaurôs a son i resonaments dai mortâi

e malsigûrs i nestris pinsîrs;

15 parceche un cuarp distinât a lâ fraidessût

al ten cjalcjade l’anime

e la tende di cheste tiere

e sfracae il sintiment cui masse fastidis.

16 O rivìn par un pêl a induvinâ lis robis de tiere

e o stentìn che mai a capî chês ch’o vin sotman;

ma cui rivarajal a scuviergi lis robis dal cîl?

17 Cui varessial podût cognossi il to pinsîr,

se tu no tu j vessis dade la sapience

e mandât jù dal alt il to sant spirt?

18 Cussì a son stâts dreçâts i trois di chel ch’al è su la tiere,

i oms e àn imparadis lis robis che tu às a grât

e midiant de sapience a fòrin salvâz.