BIBIE IN LINIE

Cjapitul 1

PRIME PART

il libri dal emanuel

Jentrade

1 1 Vision che Isaie, fi di Amos, al à vude sun Gjude e sun Gjerusalem ai timps di Ozie, di Jotam, di Acaz e di Ezechie, rês di Gjude.

Ingratitudin e coruzion

2 Sintît, cîi; scolte, tiere,

parcè che al fevele il Signôr:

“O ài tirâts sù fîs, ju ài puartâts in alt,

e lôr si son rivoltâts cuintri di mê.

3 Il bo al ricognòs il so proprietari

e il mus la trasêf dal so paron,

ma Israel nol cognòs

e il gno popul nol capìs”.

4 Puare mai jê la gjernazie pecjadorie,

il popul cjamât di inicuitât,

la raze di delincuents,

i fîs pervertîts!

A àn butât di bande il Signôr,

a àn spreseât il Sant di Israel,

a son tornâts indaûr.

5 Dulà volêso ancjemò jessi pestâts,

vualtris ch’o ingrumais ribelions?

Dut il cjâf al è malât,

dut il cûr si inflapìs.

6 De plante dai pîts fint al cjâf,

nol è nuie di intîr;

feridis, macjis

e plais viertis

no son stadis netadis ni fassadis

ni curadis cul vueli.

7 La vuestre tiere e je fiscade,

lis vuestris citâts arsinidis dal fûc,

il vuestri teren i forescj

s’al glotin presince di vualtris;

la desolazion e je tant che un fruç

fat dai forescj.

8 La fie di Sion e je restade

tant che une staipe intun vignâl,

tant che un ripâr tun cjamp di anguriis,

tant che une citât sidiade.

9 Se il Signôr des schiriis

no nus ves lassât cualchidun che le à scapolade,

o saressin come Sodome,

precîs edentics di Gomore.

Cuintri dal formalisim cultuâl

10 Scoltait la peraule dal Signôr,

sorestants di Sodome,

slungjait la orele a ce ch’al insegne il nestri Diu,

popul di Gomore!

11 “Parcè mo a mi la bondance dai vuestris sacrificis?”

al dîs il Signôr.

“O soi stuf dai olocauscj dai rocs

e dal gras dai vidiei.

Il sanc dai mançs, dai agnei e dai becs

no lu ài a grât.

12 Cuant che o vignîs a presentâsi denant di me,

cui us domandial chest a vualtris,

di vignî a balinâ tai miei andits?

13 Finîtle di puartâmi oblazions che no mi van,

l’incens al è par me une porcarie,

lunis gnovis, sabidis, sembleis publichis;

no sopuarti inicuitâts e fiestis grandis.

14 La mê anime e à in asse

lis vuestris lunis gnovis e lis vuestris solenitâts;

a son par me un pês,

o soi stuf di sopuartâlis.

15 Cuant che o slungjais lis vuestris mans,

jo o sieri i vôi denant di vualtris.

Ancje cuant che o moltiplicais la preiere,

jo no scolti gran,

lis vuestris mans a son incolmis di sanc.

16 Lavaitsi, smondeaitsi,

tirait vie de mê presince

il mâl des vuestris voris,

finîtle di fâ mâl.

17 Imparait a fâ ben,

cirît ce ch’al è just,

judait il tibiât,

fasêt justizie al vuarfin,

parait la vedue”.

18 “Dài, vignît e cuistionìn”

al dîs il Signôr.

“Se i vuestris pecjâts a son tant che il scarlat,

a deventaran candits tant che la nêf;

s’a son ros tant che la purpure,

a deventaran come la lane.

19 S’o vês buine volontât e o ubidîs,

o mangjarês i prodots de tiere.

20 Ma se si rifudais e si rivoltais,

o sarês glotûts de spade,

parcè che la bocje dal Signôr e à fevelât”.

Lamentazion sore de citât

21 Cemût mai ch’e je deventade une pelande

la citât fedêl?

E jere plene di dretece,

la justizie e jere di cjase li di jê;

cumò invezit dome sassins.

22 Il to arint al è deventât tant che crostis,

il to vin messedât cu l’aghe.

23 I tiei princips a son ribei

in societât cui laris;

a son ducj ch’a bramin regâi

e ur corin daûr a lis ricompensis.

No i fasin justizie al vuarfin

e la cause de vedue no rive fin li di lôr.

24 Par chel, sentence dal Signôr,

Diu des schiriis,

il Fuart di Israel:

“Propit!, o fasarai justizie dai miei contraris

e mi svindicarai dai miei nemîs.

25 O slungjarai la mê man sore di te,

o smondearai lis tôs crostis,

come tun for o pararai jù dut il to plomp.

26 E o fasarai deventâ i tiei judiçs come tal imprin

e i tiei conseîrs come in principi.

Dopo ti clamaran citât de justizie,

citât fedele”.

27 Sion e sarà sfrancjade cu la justizie

e chei dai siei ch’a tornaran, cu la dretece.

28 Ma i ribei e i pecjadôrs a saran fruçâts ducj intun colp,

e chei ch’a butin di bande il Signôr a saran fiscâts.

Cuintri dal cult dai idui

29 Propit, si vergognarês par colpe dai rôi

che ur tignîs tant,

e o restarês malapaiâts par colpe dai zardins

ch’o deventais mats.

30 Propit, o sarês tant che un rôl

cu lis fueis a pendolon

e tant che un zardin che nol à aghe.

31 Il fuart al deventarà lescje

e la sô vore une faliscje,

ducj i doi a brusaran insieme

e nissun no ju distudarà.

Notis:

  • 1,1 - Il titul al è metût dacjâf di dut il libri. Isaie al à profetât de seconde metât da VIII sec. p.d.C. e la sô ativitât e rivuarde la citât di Gjerusalem e il ream di Gjude.
  • 1,2 - L’acuse principâl cuintri dal popul di Israel e je cheste: si son rivoltâts al Diu dal pat. La suage di chest procès e je la devastazion dal teritori e il sidiament di Gjerusalem tant sot Senacherib dal 701 p.d.C. (2 Re 18,13s), che te vuere siro-efraimite dal 735 p.d.C. (2 Re 16,5-9).
  • 1,4 - Il Sant di Israel: titul che il profete i dà a Diu par meti in lûs la sô maiestât e la sô perfezion.
  • 1,6 - La glesie, te sô liturgjie, i apliche chest test a Crist cjamât di patiments.
  • 1,9 - Il Signôr des schiriis: titul doprât dai profetis par dâ la idee de fuarce di Diu, ch’al à sot di sè dutis lis schiriis, de tiere e dal cîl.
  • 1,10 - Cheste sentence e varès di jessi stade dite sul imprin de ativitât di Isaie. Sul stamp di Amos e di Osee, Isaie al condane il ritualisim no compagnât di une profonde cussience morâl. Lu disarà ancje Crist (Mt 7,21; Zn 4,21-24).
  • 1,17 - La vedue, il vuarfin e il forest, a jerin lis categoriis plui debulis e espostis, par chel protezudis de leç mosaiche (Es 22,21-22; Dt 14,29).
  • 1,21 - “Pelande”. L’union dal Signôr cul so popul al è a uso un matrimoni, fondât sul afiet e la fedeltât.
  • 1,27-28 - Chescj doi versets a varessin di jessi stâts zontâts dopo, parcè che a fevelin za dal esili e di cuant che il rest dal popul al tornarà cjase.
  • 1,29 - Chestis funzions fatis sot dai rôi a jerin di divignince cananee.
Cjapitui: